ओ मेरो पतिदेवकी प्रेमिका
आऊ हामी हात मिलाऊँ
मित्रताको
सह- अस्तित्वको
"ऊ "
मेरो "पति"
तिम्रो "प्रेमी "
तिमीलाई जस्तै ,
प्रेमकै बाटो भएर
पत्नी बनाएको हो मलाई पनि
तिमी र म मा के को दुश्मनी ?
के को ईष्र्या ?
के को डाह ??
एउटै हो मुटु तिम्रो ,मेरो
जति तिमीलाई दुख्छ ,त्यति नै दुख्छ मलाई पनि
आउ सँगसँगै दुखौँ
र महसुस गरौँ
लोग्नेमान्छेको वितण्डा
लोग्नेमान्छेको प्रेम
ऊ रुवाउँछ तिमीलाई
ऊ हाँस्न दिँदैन मलाई
र पनि तिमी प्रेम गर
र पनि म पूजा गर्छु
आऊ पतिदेवकी प्रेमिका
हामी गला मिलाऊँ !!
No comments:
Post a Comment