उन्मुक्ति

 जब तिम्रा आँखाहरु मेरा आँखाहरु छलेर 

दोबाटाहरुमा हराउन थाले

हो त्यसपछि ,फेरि तिम्रो प्रतीक्षा गरिनँ

म निर्दयी ,निष्ठुरी 

किञ्चित म पापीनी होइन 

मैले तिम्रो कसम कुल्चेर हिँडेकी छैन

आऊ आँखामा आँखा जुधाएर जाँचौँ

कसको कति सत्य डगमगाउँछ 

र एउटा अन्तिम फैसला गरौँ 

म अविश्वासको पर्दा उचालिरहेकी छैन

आशंकाको आगो फुकिरहेकी छैन

तिमीभित्रको "म" र मभित्रको "तिमी" माथिको निगरानी 

तिमीलाई कैदीको कयस जस्तो लाग्छ भने 

तिमी उड, मेरो स्पन्दनमा ताल्चा मारिएको छैन

र तिम्रो उडानको पखेटा काटिएको छैन

म तिम्रो बाटोमा तगारो नबनुँला !!