रङ्ग

मुठ्ठीमा लुकाएर अलिकति अबिर 

अबिरमा मिसाएर चुलामाथिको धुइँसो

तिमी एकसुरो भएर 

क- बाट कलम 

सिकिरहेका बेला

सुटुक्क तिम्रा गालाहरुमा

दलिदिंदा जति हिस्सी त आजसम्म देखिएनौ तिमी !

र मलाई लखेटी लखेटी 

तिमीले फ्याँकेको अबिरको धुलोले 

जति सुन्दर कहिल्यै बनाएन ! 

अकारण

खितखिताएर हामी 

कतिबेर हाँस्यौ होला , 

एक अर्काको छुन हुने/नहुने

अङ्गहरु कति छोइए होला ……

आऊ यसपालि ,

फेरि पनि तिमीलाई 

धुइँसोले रंगाउन मन छ ,

खितखिताएर हाँस्दै भाग्न मन छ,

तिम्रो अघि अघि ………

तिमीले फ्याँक्ने एकमुठ्ठी रातो रंगको लोभमा ।।

पत्थरको फूल

 

तिमी आफुलाई भ्रमर सम्झन्छौ

र

डस्न मात्रै खोज्छौ,

म पत्थरको फूल

डसेर तिमी आफैं नदुख

म तिमी पीडाले ग्रस्त

छट्पटिएको हेर्न सक्दिनँ

मलाई कुनै भमराको भुनभुन स्वीकार छैन,

चाहे त्यो स्वैर कल्पनाको राजकुमार किन नहोस्

म मनमौजी ,निस्फिक्रि स्वाधीन छु

मेरो सुरक्षाको नाउँमा

पैसाको खोलो नबगाऊ

प्रेमलाई कलंक बनाएर

अवैध बाबु हुन नखोज तिमी ,

मलाई आफ्नै लोग्नेबाट बलात्कृत हुनु छैन

म आफ्नो वैँसलाई आफैं लगाम लगाउन सक्छु

र

जोगाउन सक्छु कुमारी यौवन

गमलामा फुलेका फूलहरुको रंग हेरेर,

सुगन्ध सुँघेर नाम दिए जस्तो

कुनै नाम चाहन्न

म सुवासिलि, हँसिलि, सुशीला ,मनोहरा, मेनका''

अहँ केही होइन म,

मात्र म एक विद्रोह

तिम्रो मुठ्ठीमा नअट्ने,

तिम्रो संसारमा नरम्ने

फगत म एक विद्रोही फूल !!

काँचो मासु

 

मखमली  ,

रक्सी खाँदा खाँदै रक्सीले खाएका

ख्याउटे , राले , सिङ्गानेहरुले खाएको रक्सीको

गिलास 

घिन नमानी उठाउँछे 

सरफ पानीमा चोपल्छे र धस्काउँछे भिम साबुन त..ल

पोखुल्टादेखि डोकामा जोर गाग्रो हालेर

बोकेर ल्याएको पानी रक्सी भन्दा पनि फारु

गरि पखाल्छे

"एक गिलास पनि पत्याउँदिनस्

मखमली " भन्दै छिरेको हर्के एक मानो बुत्याउँछ र

भन्छ "के म गरिब छु ? " 

घरभरि खसी छन्, बासेको

भाले ल्याइदिउँला भोलि बिहान नबास्दै ,

"अब

एक गिलास थपिदेन मखमली "

मखमली हार्छे र

रक्सीका ग्यालिनहरुबाट छोरीको सुन्दर

भविष्य सार्दै , गिलासहरुमा भरिदिन्छे 

ऊ जान्दिन उसको पेसा कस्तो हो 

एकाएक

बजिरहेको रेडियोले फुक्छ घरेलु मदिरा

निषेधित विज्ञापन …… माझ्दामाझ्दैको

गिलास मखमलीको कम्पित हातले थेग्न सक्दैन

र फ्याट्ट फुट्छ भुइँमा बजारिएर 

जाँड राख्ने मकै,

कोदोको ढिँडो र मर्चा मात्रै जानेकी ऊ

आगो बल्ने रक्सी पार्न सिपालु छे 

न उसको कम्पनी छ न दर्ता 

लोग्नेले अलपत्र छोडेर

हिँडेपछि रक्सी जस्तै बल्ने मनको जलन रक्सी

बेचेर निभाउन थालेकी थिइ 

रक्सी र सुकुटीको

स्वादमा कतिले मखमलीको रुप चटनी बनाए

छोइला कचिला र अचार बनाए , त्यसको

हिसाब खोज्दिन ऊ 

घरेलु मदिरामा सरकारले

लगाएको प्रतिबन्ध सँगै उसले आफ्नै यौवनको

निर्बन्ध व्यापार खोली वरपरका आइमाईहरु

लोग्ने बिगारेको बातमा मखमलीतिर धारे

हात लगाइरहे न उसको सत्यानाश नै भयो न

कानुन पुर्जी लिएर समाउन आयो 

वाह क्या सरकार छ देशमा 

क्या प्रतिबन्ध लगाउँछ मदिरामा 

काँचो मासुको खुलेआम

विजनेश गरेर !!