तिमी आफुलाई भ्रमर सम्झन्छौ
र
डस्न मात्रै खोज्छौ,
म पत्थरको फूल
डसेर तिमी आफैं नदुख
म तिमी पीडाले ग्रस्त
छट्पटिएको हेर्न सक्दिनँ
मलाई कुनै भमराको भुनभुन स्वीकार छैन,
चाहे त्यो स्वैर कल्पनाको राजकुमार किन नहोस्
म मनमौजी ,निस्फिक्रि स्वाधीन छु
मेरो सुरक्षाको नाउँमा
पैसाको खोलो नबगाऊ
प्रेमलाई कलंक बनाएर
अवैध बाबु हुन नखोज तिमी ,
मलाई आफ्नै लोग्नेबाट बलात्कृत हुनु छैन
म आफ्नो वैँसलाई आफैं लगाम लगाउन सक्छु
र
जोगाउन सक्छु कुमारी यौवन
गमलामा फुलेका फूलहरुको रंग हेरेर,
सुगन्ध सुँघेर नाम दिए जस्तो
कुनै नाम चाहन्न
म सुवासिलि, हँसिलि, सुशीला ,मनोहरा, मेनका''
अहँ केही होइन म,
मात्र म एक विद्रोह
तिम्रो मुठ्ठीमा नअट्ने,
तिम्रो संसारमा नरम्ने
फगत म एक विद्रोही फूल !!
No comments:
Post a Comment