डायरी

 एकाएक बदलिएको उसको मन प्रति कटाक्ष पोख्दै मैले भनेँ " तिमीलाई मेरो मायामा विश्वास थिएन भने, तिमीलाई मेरो शरिरसँग मोह थिएन भने किन रात बिताउन दियौ ?"

ओठका कापहरु बाट बहादुरी फुत्काएर उसले भनेको थियो " पानीको कुवामा पुगेपछि तिर्खा नभए पनि अलिकति प्यास त जागिहाल्छ नि शाब्दिका , तिमी यसलाई विषय नबनाउ न" 

अनि यहि विषय कहिल्यै निको नहुने छातिको घाउ बनेको छ शब्द ।

डायरी

 

एउटा साधारण क्याफे । ऊ बसेको छ । म असजिलो सँग उभिएको छु छेउमा ।सँगै बस्न किन किन मनले मानेको छैन । चियाको चुस्की लिँदै उसले भन्यो ,दुईचार महिना हो गाह्रो हुने त्यसपछि तिम्रो जिवनमा पनि कोही अाउँछ अनि तिमीले बिस्तारै बिर्सने छौ ।"

यो ऊ बोलेको थिएन । भर्खरै भर्भराउँदै गरेको उसको नयाँ सम्बन्ध बोल्दै थियोे ।
चियाको कप र प्लेटको टकरावले फेरि झस्किएँ म । ऊ भनिरहेको थियोे " जिन्दगी छोटो छ ,दुखी भएर बाँच्न हुन्न तिमीले यो सब सहज स्विकार्नु पर्छ ।"
छेउको अर्को टेबलमा एक जोडी स्कुले बालबालिका अाए । दुवैको रंग कालो थियो ।पुक्क परेका गालाहरुमा खोपिल्टा पारेर हाँस्दै थिई सानी केटी । यत्तिकैमा यी दुई कसको अायु लामो छ भनेर विवाद गर्न लागे , सानी केटीले हात उचालि र फुच्चे केटाले पनि हात उचालेर अाफ्ना दुई हत्केला फुच्चीका हत्केलामा टाँस्यो । केटोका हत्केलामा केटिको हात विलायो र सानी केटी आँखाभरि आँसु पारेर कोल्टे फेरि । फुच्चे केटाले सोध्यो  "किन रोयौ ? "
सानी केटीले आँसु पुछ्दै भनी "म मरेपछि तिमी अर्को बिहे गर है " !
मलाई बालख प्रेमले फेरि टुक्राइदियो । उनीहरु मृत्युपछिको वियोगान्त कल्पना गरेर रोए ऊ जिउँदैमा मारेर खुसी खोज् भनिरहेको छ । प्रेम भन्नू पनि त केही रहेनछ ।

उन्मुक्ति

 जब तिम्रा आँखाहरु मेरा आँखाहरु छलेर 

दोबाटाहरुमा हराउन थाले

हो त्यसपछि ,फेरि तिम्रो प्रतीक्षा गरिनँ

म निर्दयी ,निष्ठुरी 

किञ्चित म पापीनी होइन 

मैले तिम्रो कसम कुल्चेर हिँडेकी छैन

आऊ आँखामा आँखा जुधाएर जाँचौँ

कसको कति सत्य डगमगाउँछ 

र एउटा अन्तिम फैसला गरौँ 

म अविश्वासको पर्दा उचालिरहेकी छैन

आशंकाको आगो फुकिरहेकी छैन

तिमीभित्रको "म" र मभित्रको "तिमी" माथिको निगरानी 

तिमीलाई कैदीको कयस जस्तो लाग्छ भने 

तिमी उड, मेरो स्पन्दनमा ताल्चा मारिएको छैन

र तिम्रो उडानको पखेटा काटिएको छैन

म तिम्रो बाटोमा तगारो नबनुँला !!