विद्रोही पारिजात

प्रिय पारिजात 

यो हाड मासुलाई 

माटोको जिम्मा लगाएर 

अाउनेछु तिम्रो समिप र सोध्नेछु तिमीसँग

तिमीले सकम्बरी र सुयोगवीर लेख्दा

साल्गीको बलात्कृत अाँसु लेख्दा 

अन्तरमुखी र अपरिभाषित अाँखा लेख्दा 

एउटा अपमान सहि

एउटा तिरस्कार सहि

एउटा अपवाह सहि

कसैकी रण्डी हुन पर्यो कि परेन ? 

कसैकी वेश्या हुन पर्यो कि परेन ? 

मलाई शंका लाग्छ 

कतै उपमाहरुको भारीले 

आशंका र कपोकल्पित दिग्भ्रमहरुले

तिमीलाई बाँझो राखेको त थिएन ?

म मेरा घाउहरु देखाएर सोध्नेछु तिमीलाई 

तिमीले ती घाउहरु 

उतै छोड्यौ कि सँगै लिएर आयौ ? 

त्यहाँ जस्तै पोल्छ कि शितल छ यहाँ ?

कट्कटी दुख्ने हातगोडाका जोर्नी 

अशक्त फोक्सोको उकुसमुकुस 

त्यहाँभन्दा बेसी 

दुख्यो कि दुखेन मनको धरातल ? 

प्रिय पारिजात 

फुलेपछि नझर्ने जीवन के को छ र ?

तिमी झर्यौ एउटा उचाइमा पुगेर

म भुइँमा पोखिनुको 

बाटोमा छरिनुको 

हजारौं पैतालाले कुल्चिनुको 

एउटा तितो कहानी लिएर अाउनेछु

मेरा सवालहरुको जवाफ खोजिराख है ।।

दुरी

 

टाढा छु 

तर  नजिक छु 

घामभन्दा पनि नजिक 

जून भन्दा पनि नजिक

सुनिरहेछु 

तिम्रो मुटुको धक्धक

देखिरहेछु आँखाको न्यास्रो

र महसुस गरिरहेछु यारा

तिम्रो आलिंगनको न्यानो !! 

तिम्रा सुस्केराहरुमा 

थकानहरुमा गलिरहेछु तिमी जस्तै 

तिमी मुस्कुराउँदा मात्रै हाँस्छ हिमाल

तिमीसँगै झरिरहेछ आकाश

भिजाएर छातिको देब्रे पाखो 

जति उर्बर होस् जमिन

तिम्रो वर्षा बिना 

मेरो प्रेमको पाटो बाँझै रहन्छ यारा !!

✍️अनामिका सजल

प्रेम या ईष्र्या

 तिमी उसको सर्टको कलरमा 

मेरो लिपिस्टकको दाग खोजिरह्यौ 

उसको अंगालोमा मेरो पर्फ्युमको सुगन्ध खोजिरह्यौ 

अनि खोजिरह्यौ 

मोबाइल र ल्यापटपमा 

मसँगका कल हिस्ट्री र च्याटका स्क्रिन सर्टहरु

विडम्बना 

खोजिनौ र भेटिनौ कहिल्यै 

मेरो आँसुले भिजेको उसको छाति 

मेरो क्रन्दनले उफ्रिएको उसको मुटु

मेरा आँखामा हेर्न नसकेर झुकेको उसको नजर

मेरो आँसु पुछेर भिजेका उसका अौंला

शंकाको कठघरामा उभ्याएर 

मसँग छुटिसकेको उसलाई 

मेरै नाममा कसम खुवाएर 

तिमी उसलाई प्रेम गर्छ्यौ 

या मेरो प्रेमको ईष्र्या ??